Саранскойсэ Од ломанень театрась невтизе васенце путоманзо

Премьерась ютась ожоковонь 11-це чистэ «Россия» кинотеатрасо. «Кафе добра» – истямо лем ало спектаклянть ваномо сакшнось Мордовиянь Прявтось Артём Здунов.

Невтеманть икеле региононь ветицясь ванынзе интерактивной площадкатнень, конат важодсть кинотеатрань фойесэ. А седе тов лия ваныцятнень марто вейсэ, конатнень ютксо сехте ламотне – од ломанть ды эйкакшт, сон озась ваномо путоманть. Эряви меремс, спектаклясь пурнась аншлаг! Ваномань нупалесь тыц пешксель ломанде.

Спектаклянь сюжетэсь юты «паро тевень теемань кафесэ». Официанттнэ лездыть эйкакштнэнень ютамс стакачитнень, конатнень марто сетенень савкшнови вастовомс: кинь-бути арасть ялганзо, кинь-бути тейтерькась а вечксы, а кинь-бути ёмась кисказо. Кафенть арсить пекстамс, секскак официанттнэнь эряви теемс седе ламо паро тевть заведениянть ванстомга.

«Сценариянть сёрмадомсто прявт бажамокс ульнесь теемс потомежонь сюлмавкст эйкакштнэнь марто. Эряви сынст марямс, чарькодемс ды шкасто годявомс маласо», – мерсь путомань режиссерось Динара Сайфутдинова.

Ваныцятненень вечкевсь. Сынь мельспаросо вансть сень мельга, мезесь тееви сценанть лангсо. Истяжо вечкевсь, зярдо артситтнэ кармась налксеме весе ваныцятнень марто. Сюжетэнть коряс, кафесэнть ютась содамочинь квиз. Официанттнэ макснесть весенень кевкстемат содавикс сериалтнэнь, мультфильматнень коряс. Виде каршо валтнэн кис явшесть апокш казнеть.

«Тейть паро, ды сон тонеть велявты», – исямо девиз ало ютась налксемась.

Премьерадонть мейле Артём Алексеевич макссь од артисттнэнень цецянь пусмот.

Ледстясынек, Од ломанень театрась панжозель Саранскойсэ те иень аштемковсто. Тенень лездась  Культурань инициативань Президентэнь фондось. Проектэнть топавтызь казанской Од ломанень Булаксо театрань командась  Мордовиясо театрань специалисттнэнь марто вейсэ. Ней те труппась карми важодеме «Россиясо» свал.