Няфтеви Михаил Девятаевонь подвигонц колга спектакль
Опубликовано Вайгель - 12.10.2023
Мокшэрзянь национальнай драматическяй театрать «STOP Фашизм» проектоц сяськсь Россиянь Культурань министерствать целевой грантонь максомань конкурссонза. Видесонза ётафтови аф фкя мероприятия. Сембода оцюсь—земляконьконь, Советскяй Союзонь Геройть, мокшалять Михаил Девятаевонь колга спектакльть путомац.
Пьесать мокшень кяльса сёрмадозе Мордовиянь Народнай писательсь, драматургсь Валентина Мишанина. Юркс арась Девятаевонь автобиографическяй книгац. Валентина Ивановна содазе Михаил Петровичень, сон корхнесь мархтонза сельмоста сельмос. Сяс документальнай произведенияса кармайхть лётчикть биографияста ламотненди аф содаф фактт.
«STOP Фашизм» проектсь ащи кой-мзярошка пяльксста. Васендакиге, тя Саранск ошень Воинскяй славань музейть мархта вастста вастс ётафневи фотовыставкать анокламац. Фотографиятнень эса няфтевихть Великай Отечественнай войнань стака кизотне, концлагерьса улемась. Тиеви Михаил Девятаевонь бюстоц, конань няйсы спектаклень эрь ванысь. Снимандави ролик, конань эса азондови фашизмать сяськомаса Россиять вастонц колга. Стане жа «STOP Фашизм» проектть видеса театрать ёмла залсонза ётафтовихть школьникненди мероприятият, конатнень пингста азондови фашизмать, кода тяниень пингонь явлениять, колга.
«Побег из ада» лем ала постановкать премьерац Мокшэрзянь национальнай театраса ули 26 и 27 октябрьста.
