Сёксня Мордовиясо ютыть культурань ламо мероприятият.

Яушевень лемсэ оперань ды балетэнь театрасо ютась пресс-конференция, косо МР-нь культурань, раськень политикань ды архивень тевень министрась Светлана Баулина ды Эрьзя лемсэ музеень прявтось Людмила Нарбекова ёвтнесть С. Эрьзя ине скульпторонть юбилеетень анокставиця программадонть.  Прявт тевекс карми сундерьковонь кеменце чистэ музейсэ «Степан Эрьзя-скульптор мира» невтемань панжомась. Башка ёвтнезель седе, кода полавтови Эрьзянь важодевкстнэнь свалшкань экспозициясь ды целанек музеень таркась; истя жо невтизе сувенирэнь продукциянть, конань анокстызь музеень важодицятне мастерэнть юбилеентень. Сёксень меельце ковось карми пешксе событиядо, конат алтазь минек содавикс скульпторонтень. Оперань ды балетэнь театрась невтьсы «Степан Эрьзя» балетэнь премьеранть, юты весероссиянь джазонь II фестивалесь ды «IX Эрьзинские чтения» раськеютконь конференциясь. Истя жо ваныцятнень учить «Россиянь Музеень маршруттнэ» ды Рузонь музеень читне.