Саранскойсэ ильтизь меельце кив Николай Мокшинэнь
Опубликовано Вайгель - 20.03.2023
Эйзюрковонь 18-це чистэ эрямостонть тусь масторонть келес содавикс учёноесь Николай Федорович Мокшин. Тедеде сонензэ топодевель 87 иеть.
Ильтямс меельце кив Николай Федоровичень Рузонь драмань театрав, косо ютась трауронь церемониясь, састь профессоронть семиязо, малавиксэнзэ, ялганзо, коллеганзо, тонавтницянзо, студентт.
Николай Федорович чачсь Нижегородской (икеле Горьковской) ёнксонь Иванцево эрзянь велесэ педагогонь семиясо. Тонавтнесь педучилищасо, мейле Мордовиянь университетэнь Историянь факультетсэ. Прядсь аспирантура. 1964-це иестэ идизе кандидатонь диссертациянзо М. Ломоносовонь лемсэ Московонь университетсэ.
Николай Мокшин — содавикс аволь ансяк Мордовиясо, истяжо Россиясо, историк, этнограф, ономатолог, религиовед, музеевед ды географ. Сонзэ 300-то ламо наукань ды тонавтомань-методикань важодеманзо, конат печатазельть республикань, Россиянь ды томбалень печатьсэ. Сынст ютксо 10 ламо книгат.
Николай Федорович пусть ойме ды ламо вийть эсензэ важодематнес, конатнесэ евтневи эрзятнень ды мокшотнень историяст ды этнографияст ланга.
