Саранскоень эрицятне максызь вайгелест Фонтанонь спусконть кис

Ледстясынек, чадыковонь 30-це чинть самс Мордовиясо мольсь вайгелень кочкамо территориянть кис, кона карми паролгавтозь «Жилье и городская среда» нацпроектэнть лувсо 2025-це иестэ. Цётамотнень коряс, изницякс лиссь Фонтанонь спускось Московская куросонть.

Кисэнзэ, ошонь прявтонть Игорь Асабинэнь валонзо коряс, максозель 34 тёжадо ламо вайгельть. Весемезэ вайгелень кочкамосонть невтизь пряст 73 тёжадо ламо ломанть. Истяжо Игорь Юрьевич ёвтась сюконямонь валт волонтёртнэнень, конат якасть ошонь куротнева ды лездасть эрицятненень максомс эсь вайгелест.

Икельце иетнестэ теке проектэнть коряс Саранскойсэ паролгавтозельть Т. Бибинань куросо паркось, Веденяпинтнэнь бульварось, Ленинской райононь паркось, Подольской курсантнэнь ды Донбассонь идицятнень сквертнэ, Цаплинэнь бульварось.