Лиссть «Образы старого Саранска» книгань васенце экземпляртнэ

Прядовсь важодемась «Образы старого Саранска» книганть лангсо, кона алтазь Саранскоенть 380 иетненень. Типографиясо нолдазельть  васенце экземпляртнэ.

Книгань автортнэ – И. Д. Воронинэнь лемсэ краеведениянь музеень наукань важодемасо прявтонть полавтыцясь Дмитрий Фролов ды музеень историянь отделэнь ветицясь Светлана Телина.

Те книгасонть пурназть революциядо икелень Саранскоень фотографиятне: сонзэ эрицянзо ды зданиятне, конатнень ютксто ламотне умок арасть.

Эрьва фотографиясь сёрмадстозь историясто саезь домка комментариясо. Бути фотографиятнень лангсо — ломанть, сестэ ловныцятне теевить содавиксэкс сынст биографияст марто, бути зданият – сынст историяст ды неень шкань адресэст марто. Нама, бути зданиясь ванстовсь.

Книганть пурнамсто-сёрмадомсто теезель покшдояк покш робота: ванозельть архивть, музеень фондтнэ; автортнэ сюлмавкшность Саранскоень кезэрень родтнэнь нуцькаст марто, конат эрить аволь ансяк Россиясо. Кой-мезть ошонь эрицтяне кандсть сынсь. Кой-кона материалтнэ кучозельть Россиянь лия регионтнестэ ды мик лия масторсто – Франциясто, Швейцариясто ды лиясто.

Эряви тешкстамс, «Образы старого Саранска» книгасонть васенцеде сёрмадозельть воеводатнень ды ошонь прявттнэнь, дворянствань ды земствань прявттнэнь малав пешксе спискатне.

Карматано учомо  — малавгалиця шкастонть книганть ушодыть микшнеме.