Мордовиянь прявтось Артём Здунов ютавтсь важодемань промкс ведень объекттнэсэ эйкакштнень укшномантень ды ведь лангсо прянь ветямонь тонавтомань кевкстематнень коряс. Эйсэнзэ ульнесть министратнень кабинетэнь члентнэ, истя жо од ломанень блоконтень совицятне.

Прявт пачтямо марто кортась Мордовия Республикань ВОСВОД-нь Председателесь Валерий Евдокимов. Тешкстазель, республикасонть ванстови эйкакштнень ведь лангсо укшномань ды прянь ветямонь ёрокчитненень а сатышка анокстамонь стакачись. Те тевенть топавтомга прявт тевекс сон лови весе комплексной пелькстамотнес укшномань дисциплинатнень совавтоманть, истя жо ГТО-нь норматнень максоманть ды «Зарница 2.0» военно-патриотической налксеманть. Те лезды анокстамс пелькстамотнес ды саемс укшномань ёрокчить од ломантнень пельде.

«Тынк лезксэнк вельде, Артём Алексеевич, образованиянь Министерстванть, спортонь Министерстванть ды од ломантнень тевест коряс Госкомитетэнть марто вейсэ ютавтозельть 50 метратнень дистанциясо укшномань коряс пелькстамот «Спартакиады допризывной молодежи РМ» программанть коряс, — тешкстызе Валерий Евдокимов. — Саранскойсэ, Рузаевкасо, Ковылкинасо, Краснослободскойсэ, Ичалковской райононь Отяжеле ды Рождествено велетнесэ пелькстасть малав 500 14 иестэ саезь 17 иес од ломанть. Пелькстамотне васенцеде ютасть истямо масштабсо»

Мордовиянь образованиянь министрась Елена Солдатова пачтясь, укшномантень тонавтомась ветяви сеть эйдень кужотнесэ ды школатнесэ, косо улить бассейнат, ветяви урочной ды аволь урочной тевдееманть лувсо. Эйдень кужотнесэ занятиятне ютавтовить ниле иестэ саезь эйкакштнень марто, школатнесэ тенень алтазь недлязонзо физкультурань колмо уроктнестэ вейкесь. Тонавтоманть топавтыть школатнесэ 26 инструкторт ды эйдень кужотнесэ 10 -весе сынь ютасть тонавтомань башка программа ды сынст ули «плаврук» квалификацияст.

Кортамодонть мейле Мордовиянь Прявтось кармавтсь Правительствантень анокстамс покшчинь аравтлув ведень объекттнэнь вешематнень коряс, конатнень мереви нолдамс тевс ламо ломань марто экшелямонть туртов. Истя жо эряви ютавтомс покш инвентаризация укшномань тонавтоманть туртов ды инструктортнэнень. Башка мель явозель «Старт» стадиононь комплексэнь одкстомтомань коряс важодематненень.

«Тонавтнемань ютазь иенть перть укшномантень тонавтомань программанть ютызь малав 8 тёжат – те а саты! — меельцекс мерсь Артём Здунов. — Карматано нолдамо тевс эрявикс весе инфраструктуранть. Совавтсынек укшноманть тосонь пелькстамотнень программантень, 2027 иестэ «Зарницань» весе пелькстнэсэ укшномась карми эрявомо. Списканть карматано келейгавтомо! Анокстатано эйкакштнень пек эрявикс ёрокчинтень – укшномантень тонавтомань коряс мероприятиятнень аравтлув»