Саранскоев сы «Изнямонь поездэсь»!

Эйзюрковонь 16-це чистэ Саранскоень чугункань кинь вокзалонтень сы «Изнямонь поезд» музеесь. Сон карми Мордовиянь прявтошсонть эйзюрковонь 18-це чис молемс. Лиятнень енов а молиця экспозициянть ваномга эряви саемс питневтеме билет ды ютамс регистрация официальной сайтсэнть https://xn--90afbbcj1cdee0l.xn--p1ai/raspisanie/.

«Изнямонь поездэсь» — те масторлангсонть васенце имменсированной инсталляция, конась путозь поездэс. Экспозициянть юрсо Ине Отечественной войнадонть евтнемась, конань пачтизе ветеранось-чугункань кинть лангсо важодицясь. Таркасто таркас шаштневиця музеесь ашти 9 вагонсто, эрьвась эйстэст алтазь Ине Отечественной войнань башка пельксэнтень.

Экспозициятнень невтемстэ кармить топавтовомо санитарно-эпидемиологиянь вешематне. Вейке вагононтень ве шкасто нолдавить 12  ваныцят ды волонтер.

Проектэнь анокстыцятне-ютавтыцятне: Наукань ды высшей образованиянь министерствась ды «Российские железные дороги» ПАО-сь.

Мордовиясо чачозетне лия раськетнень марто вейсэ тейсть покш путовкс гитлерэнь Германиянь изнямонтень. Минек енкссо чачозь 249 тежадо ламо ломантне ульнесть тюремань весе фронтнэсэ. 110 тежадо ламотне — казезь боевой ордентнэсэ ды медальтнесэ, 124 ломантненень максозь Советской Союзонь Героень лемесь, 32-тне — Славань орденэнь пешксе кавалерт. Мордовиясо чачозь 134 тежадо ламо ломантне эзть велявто кудов тюремань паксятнестэ.