Ушодовсь «Праведный воин Фёдор Ушаков» просветительской акциясь.

Мордовиясо «Мир возможностей» федеральной партиянь проектэнть лувсо ушодовсь регионъютконь од акция, конась алтазель Иневанькс праведной воинэнть Феодор Ушаковонь канонизациянь 25 иетненень. Сонзэ участникекс кармить Мордовия Республикань, Крым Республикань, Севастополень ды Херсонской областень школань 9-10-це классонь тонавтницятне.

Мордовиянь прявтось, «Единая Россия» партиянь региононь отделениянь секретаресь Артём Здунов ледстизе: умарьковонь 5 – це чистэ республикасонть тешкстави содавикс тев весе православной масторлангонть туртов-Феодор Ушаковонь канонизациянь чистэнть 25 иетнень топодемась. «Праведный воин Фёдор Ушаков» просветительской акциясь — мероприятиятнестэ вейкесь, конась алтазь те чинтень.

Регионъютконь акциянть лувсо арсеви ютавтомс ванномат Иневанькс праведной воинэнть Феодор Ушаковонь эрямодонзо, эсь региононь иневанькс таркатнеде, истя жо урокт-презентацият 5-8-це класстнэсэ тонавтницятнень туртов.

Акциянь прявт пельксэсь юты чадыковонь 17-це чистэ саезь аштемковонь 21-це чис, цётамотнень тейсызь аштемковонь меельце читнестэ.

Саранскоень ды Мордовиянь митрополитэсь Зиновий лемдизе Феодор Ушаковонь алкуксонь государственникекс, конасонть вейсэндявсть пазнэнь кемемась ды тиринь масторонтень вечкемась. Апак изняво адмиралось ашти Ине доблестень, тактической гениень, седеймарямонь ды Отечествантень служамонь невтевксэкс.

Акциянь участниктненень шумбракстнемань валт кучсь Рф-нь Госдумань Председателень полавтыцясь Анна Кузнецова. Эйсэнзэ, башка, ёвтазь: «Те акциянть ушодомась — прявт эскелькс минек свалшкань питнейчитнень кемекстамосо».

«Единая Россия» партиянь «Мир возможностей» федеральной партиянь проектэнь координаторось Роман Романов тешкстызе: «Тынк ушодксонть минь покш мельсэ кирдсынек!»

Видеонть вельде акциянь участниктненень пшкадсь истя жо «Единая Россия» партиянь ЦИК-нь руководителесь, Госдумань депутатось Александр Сидякин. Видеосвязенть вельде мероприятиянтень вейсэндявсть Крым Республикань ды Севастополень представительтне. Фёдор Ушаковонь лемезэ сынст туртов кеместэ сюлмавозь Раужо Иневедень флотонть тееманзо марто. Сынь ёвтасть Сюкпря Мордовиянь командантень истямо акциянь ютавтомань ушодксонть кисэ-пек эрявикс, васняяк, минек од ломантнень туртов, школасо тонавтницятнень патриотизмань лувсо кастоманть туртов.