Тедеде Мордовиянь педуниверситетсэ приёмной кампаниясь ушодови седе икеле ютазь иетнень коряс

2021-це иестэ М. Е. Евсевьевень лемсэ университетсэ приёмной кампаниясь ушодови аштемковонь 19-це чистэ. Тенде мерсь вузонь приёмной комиссиянь ответственной секретаресь Ольга Терёшкина. Коенть коряс, конёвонь саемань шкась ушодовкшнови аштемковонь 20-це чистэ. А тедеде сон пры недлячис, секскак кампаниясь ушодови чиде седе икеле.

Документань максомо абитурентнэнь мереви самс эстест университетэв. Тенде башка, мереви кучомс конёвтнень приёмной комиссияв почтань операторонть марто, вузонь электронной системанть пачк эли «Госуслуги» порталонть лезксэнзэ вельде.

Тедеде абитурентнэнь туртов панжадо 900 питневтеме таркат бакалавриатов, 196 – магистратурав ды 155 – средней профессиональной образованиянь программманть коряс.

Ярмакто, од вешематнень коряс, сайсызь весень, кить кадыть яволявкст.