Од площадка тонавтницятненень!

Курок Саранскоень 39 № школасонть карми неень шкань спортонь площадка, конань прявт пельксэнть сайсы 22х40 метрань покшолмасо футболонь паксясь. Теде пачтясь школань прявтось Сергей Терешкин.

Пильгеоскань паксясь-тесэнь тонавтницятнень ламо пингень мелест. Ды окойники сон топавтови. Школань территориясонть уш ветявить важодемат. Специальной техникась тесэ  ожоковонь 7-це чистэ саезь. Се шкастонть  тевтне молить апак лотксе.

Васня вейкетстязель футболонь сыця паксянть коряс площадкась. Мейле ацазь чувар, щебень, валозь бетон. Паро, пертьпельксэсь ульнесь лембе, коське, бетононть кенеремазо, кона валовиль блоксо, тееви паро условиянь пингстэ.

Бетононь коцтонть покшолмазо 1 тёжадо ламо квадратной метрат. А сонзэ сэрезэ-15 см.Те кеме, кеме юр. Спортплощадкась вельтяви искусственной газонсо. Сон пиряви 2 метрань сэрьсэ кшнинь пирявкссо, эштё 3 метрас сонзэ поладсы синтетикань сеткась. Истя маласо кудонь эрицятненень, а эряви мелявтомс осканть ливтямонзо кувалма. Футболонь паксянть  вакссо кармить истяжо чийнемань яннэть. Теевить трибунат.

Тевесь вишкиненть мельга-мазый стадионсонть улест мазый налксемат, мелень явиця налксицят ды сельмс каявиця голт. Ансяк тонавтницятне анокт тень весементь топавтомс.