Саранскойстэ куватьс эрицясь Анастасия Цыганова чадыковонь 5-це чистэ тешкстынзе 100 иензэ

Саранскойстэ куватьс эрицясь Анастасия Цыганова чадыковонь 5-це чистэ тешкстынзе 100 иензэ.

Мордовия республикань Прявтонть Артём Здунов пельде пингень юбилей марто Анастасия Алексеевнанень поздоровонь валт ёвтась Администрациянь ветицянть полавтыцясь – Мордовия Республикань Прявтонть Администрациянь ды Мордовия Республикасо Правительствань Внутренней политикань управлениянь прявтось Александр Ратников.

Сон казесь юбиляронтень казне ды Российской Федерациянь Президентэнть Владимир Путинэнь пельде поздоров марто сёрма.

Лембе валт ды паро мельть-арсемат марто Анастасия Алексеевнанень пшкадсь Саранскоень Октябрьской буень прявтось Олег Дыдыкин.

– Ёвтан поздоровт кеняркс марто! Сюкпря тыненк сень кис, мекс тынь истямо кеме ломань. Миненек эряви тынк кедьстэ тонавтнемс, – мерсь сон.

Александр Ратников кевкстизе Анастасия Алексеевнань, мейсэ салавачись куватьс эрямосонть.

– Ды арась кодамояк салавачи. Монь авамгак ульнесь куватьс эрицякс, вейксэньгемень кавто иес эрясь! – мерсь именинницась.

Анастасия Алексеевна Цыганова чачсь вейке 1924-це иень чадыковонь 5-це чистэ Прасковья ды Алексей Вашуркинтнэнь семиясо.

Сон кармась семиясонть 8-це эйкакшокс, ансяк, видьстэ меремс, мельс ледить ансяк 2 лелянзо-ялаксонзо Иван, Николай ды патянзо-сазоронзо Мария ды Наталья. Колмо эйкакштне кулость эштё сонзэ чачомадонзо икеле.

Отечествань Ине Войнань шкатнестэ од тейтересь Настя важодсь стамонь фабрикасо: стась гимнастёркат ды шинельть фронтов.

Зярдо Анастасиянень ульнесь 17 иеть, сась фронтов тердема.

– Авам авардсь, а мон монсь кенярдокшнынь. Сестэ прявт инженерэсь саимем кедьте ды ветимим буень военкоматов призывде бронь мельга, – ледстни авась.

Война мейле шкатнестэ важодсь фотороботань фабрикасо приёмщицакс.

1946-це иестэ фронтсто сась велявтсь Николай, кода мейле годявсь, сыця шкасто сонзэ мирдезэ. Теинзе сынст содавиксэкс Анастасиянь сазорозо, конась ульнесть оякс Николаень ялаксонзо марто.  Вечкевсть сынь вейкенень-вейкенень васенце варштавксонть мейле.

Урьвакстсть сынь 1946-це иестэ ды мольсть кедьте кедьс 38 иеть. 1984-це иестэ мирдесь кулось.

Цыгановтнень кудораськесэнть кавто цёрат Юрий ды Валерий. Анастасия Алексеевна сюпав сырькаесь:  сонзэ ниле нуцьканзо, нуцьканзо 6 эйкакшт ды нуцькань эйкакшонь 4 эйкакшт. Весе сынь вечксызь сырькаест.

Кудоютксо лездыть Нина урьвазо ды Галина племянницазо: пидить ярсамопель, кудонть урядасызь, давлениянть онкстасызь ды ледстясызь лекарстватнень симемс. Ютко шкасто авась ваны теливизор, мезесь лезды свал содамс республикань ды масторонь меельце кулятнень.

Юбиляршась пек кенярдсь инжетненень.