Саранскойсэ панжови невтема «Наука и общественное служение».

Аштемковонь 22-це чистэ топодить 90 иеть Россиянь культурань заслуженной роботникенть, Мордовиянь наукань заслуженной деятеленть Николай Мокшинэнь чачома чистэнзэ. Сон кассь Горьковской (ней Нижегородской) областень Лукояновской райононь Иванцево велесэ. Лукояновань педучилищадо мейле прядызе Мордовиянь университетэнь историко-филологической факультетэнть, мейле – аспирантуранть. Ды седе тов профессиональной биографиязо сюлмазель Мордовиянь вузонть марто, косо сон ютась ки ассистентстэ саезь профессоронть, кафедрань прявтонть видьс. Тонавтомань тевдензэ башка Николай Фёдорович свал явсь мель научной исследованиятненень ды сёрмадсь стихть. Эряви меремс, кой-конатне юткстост ульнесть моротнень юрокс ды гайгить содавикс артисттнэнь морамосо.

Содамочис бажиця, сон тонавтнесь эрзятнень ды мокшотнень ютазь шкань эрьва кодат ёнкстнэнь ды тейсь покш путовкс региононь науканть туртов зярыя од ёнкстнэнь кемекстамонтень: этнической историянть, ономастиканть ды картографиянть, культурологиянть ды краеведениянть.

А стяко Николай Мокшинэнь лемдекшнизь энциклопедистэкс. Сон аволь ансяк нолдась малав 500 научной статьят ды 20 монографият, истя жо кувака пингензэ перть трясь – кастсь зярыя исследовательть-историкть ды этнографт. Сонзэ прявтсо покш наукас совасть наукань кавто докторт ды ниле кандидатт.

Видьстэ меремс, Мокшин профессорось тейсь Равчирень ды Уралонь финнэнь-угрань раськетнень этнологиянь научно-педагогической школа, панжсь Этнографической музей Эрзянь ды мокшонь госуниверситетэнть юрсо.

Николай Фёдорович кулось 2023-це иень эйзюрковсто, ансяк тонавтницянзо ды мельганзо молицятне а стувтнить учёноенть ланга, кинь важодевксэст икеле ладсо а ёмавтнить эрявиксчист.

Николай Мокшин профессоронть чачома чистэнзэ саезь юбилеентень И.Д.Воронин лемсэ республикань краеведениянь музейсэ панжови «Наука и общественное служение» выставкась, кода ледстнемань ды сонзэ изнявкстнэнь витькстамонь тешкс.

Экспозициянтень совавтозь ули-паротне, фотографиятне, рукопистне, документтнэ лездыть ваномс учёноенть-исследователенть личностензэ кемекстамонть ды сонзэ мелензэ-арсеманзо ламочинть мельга.

Николай Фёдоровичень снимкатнесэ экспедициятнесэ ды масторлангонь научной сообществань содавикс представительтнень ютксо.

Невтелмась пештязь Мокшинтнэнь кудораськень архивстэ материалтнэсэ: казнеть, наукань важодевкст, сонзэ валморонзо лангс моро марто дискт, учёноенть портретэзэ, конань сёрмадызе Марат Шанин Мордовиянь раськень артыцясь.