Саранскойсэ невтсть «Юные актеры — детям Донбасса» федеральной проектэнь путомат

Даволковонь 28-це чистэ Саранскойсэ, И. М. Яушевень лемсэ музыкань театрасо, невтезельть «Юные актеры – детям Донбасса» федеральной проектэнь кавто путомат. Сонзэ арсицязо-теицязо – «Музыкальное сердце театра» Москов ошсто аволь коммерческой автономной вейсэндявксось. Проектэсь, кона кармась Культурань инициативань Президентэнь фондонь изницякс, алтазь искусствань ды шкинемань пачк трямс эйкакштнесэ виде ванома эрямонть лангс, совавтомс сынст мельс ды арсемас эрявикс мельть ды арсемат, кастомс сынст эйстэ паро ломанть. Путоматнень невтизь СВО-нь зонатнестэ Мордовияв сыця эйкакштнень ды сынст марто ве классо тонавтницятнень туртов.
«Те проектэсь алтазь кирдемс Донбассонь эйкакштнень. Минек ули меленек евтамс: сынь аволь ськамост, минь – мартост. Неть путовкстнесэ минек ули меленек аламодо кенярдовтомс сынст», – мерсь спектаклятнень режиссерось-постановщикесь, «Музыкальное сердце театра» студиянь ветицясь Светлана Горшкова.

Васенце путомась – «Красная шапочка & Серый волк» Россиясо содавикс композиторонть Евгений Крылатовонь седе вишка эйкакштнень туртов ёвксось. Пряс якстере путомка марто тейтерькадонть, сонзэ сырькаедензэ ды Верьгиздэнть башка тесэ появась эште вейке герой –Людоед. Самай сон салызе кудосто тейтерьканть сырькаензэ. Аволь Верьгизэсь, конась чийсь зоопарксто ды теевсь Якстере шапочкантень паро ялгакс. Сырькаесь, кода лиссь, ульнесь тонавтыцякс ды овсе чаракавтызе Людоедэнть, кона ульнесь чаулакс, аволь кежей ломанекс, эсь тонавтомасонзо. Прядовсь евксось парсте: кияк киньгак эзизе сэве.

Омбоце путомась – «Юная любовь в пяти театральных измерениях» Уильям Шекспирэнь содавикс трагедиясто Ромеонь ды Джульеттань ютксо вечкемадонть спектаклясь-урокось. Те путоманть сюжетэзэ содавтынзе ваныцятнень вете масторонь театрань культуранть марто – Россиянь, Грециянь, Италиянь, Германиянь, Япониянь. Те путовксоськак прядовсь парсте. Ромеонь ды Джульеттань ютксо вечкемась теинзе оякс Капулетти ды Монтекки семиятнень.
Прявт рольтнень путоматнесэ налксизь московонь театратнень ды Светлана Горшковань театрань студиянь актертнэ. Ютксост ульнесть ламо эйкакшт, конатне эсь потмоежосост седе малавикст ваныцятнень туртов.
«Миненек пек вечкевсь. Эзинек учояк истят сюжетт», – кортасть эйкакштне.
Эряви меремс, И. М. Яушевень лемсэ театрась пешксель ваныцядо. Эйкаштне виевстэ цяпасть ды мизолдсть. А те, кода содави, сехте покш питне артисттнэнь важодемаст туртов.
Путоматнеде мейле актертнэ лиссть теемс эйкакштнень марто фотографият.

«Юные актеры – детям Донбасса» проектэнь путоматне васенцеде невтезельть ютазь иень умарьковсто Москов ошсо. А седе тов ¬– Россиянь лия оштнесэяк: Краснодарсо, Симферопольсэ, Севастопольсэ, Тверьсэ, Рязаньсэ ды лиясо. Малавгалиця шкастонть, кода мерсть теицятне, проектэсь арды инжекс Россиянь эште вете ошов. Весемезэ неть путовкстнэнь несызь 20 тежадо ламо эйкакшт ды од ломанть.