Московонь «Эрмитаж» кужонть вакссо юты «Шумбрат» эрзянь ды мокшонь раськень покшчись.

Кенярксось тешкстави медьковонь 8- це чистэ ды алтави кудораськень, вечкемань ды кемемань чинтень.

«Шумбрат» эрзянь-мокшонь кенярксчись карми  вадря невтевксэкс, кода Россиянь раськетнень вейсэндявомань Иестэнть минь ванстано ды виевгавтано минек масторонь эрьва раськетнень культурань сюпавчинть, — тешкстызе Москов ошонь национальной политикань ды регионъютконь сюлмотнень Департаментэнь руководителесь Виталий Сучков.

Кенярксчинь программась ушодови 17 чассто. 21 часос невтеви интерактивной экспозиция, конась алтави Степан Эрьзя скульпторонть чачома чистэнзэ 150 иетнень топодемантень.

«Мордовия мастеровая» ярмункась содавтынзе инжетнень раськень кедьчелькев ломантнень теевксэст марто, кинь ули мелезэ, мереви эсь кедьсэ теемс раськень мештень мазылгавтомапельть ды пулай каркс, анокстамс няка-ванстома, кодамс кедькс этнической лувсо, артомс эрзянь ды мокшонь раськень оршамопелень эскизт, варчамс понасто кевердемс лембе кемть ды седе тов. Спортонь площадкасонть 18 чассто саезь 20 часос сыцятненень мереви пелькстамс раськень налксематнесэ ды национальной единоборстватнесэ.

Фестивалень сценанть лангс 18 чассто 40 минутасто лиси Россиянь эстрадань морыцясь -Натали. 19 чассто 20 минутасто музыкань эстафетанть поладсы Инна Каменева ды «Параскева» шоу-группась, «САДко» группась ды Мордовиянь Заслуженной артистэсь Андрей Бочканов.