Мордовиянь Прявтось Артём Здунов ульнесь «Раськень озкс» раськень-фольклоронь покшчисэнть!
Опубликовано Вайгель - 12.07.2022
Медьковонь 9-це чистэ Покш Игнатовань енксонь Чукалы велесэнть ютавтовсь «Раськень озкс» республикань раськень-фольклоронь кенярксчись. Сонзэ юрсо ашти эрзянь кезэрень коесь – весераськень озномась – конась туи эсензэ ундокстнэсэ язычествань шкатнес. Эрьва бажицянтень меревсь каямс тиринь ёнкссто ускозь мода Маронть лангс. Те коесь сюлми кезэрень ды неень шканть. «Раськень озксось» ютавтови колмо иес весть. Тезэнь пурнавкшновить эрзятне Россиянь ламот регионтнэстэ. Кенярксчись вейсэнди перьканзо лия раськень ломантненьгак, конат аштить ялгаксчисэ ды чарькодемасо эрить Мордовиянь моданть лангсо. Покш кужосонть яволявтозель эрзянь инязорось – аволь умок те таркантень кочказь Мордовиянь раськень артистэсь Сергей Адушкин. Инязорось кармавтсь весенень вечкемс ды ванстомс тиринь келенть, ванстомс эсь раськень койтнень ды культуранть. Покшчинтень сакшность Мордовиянь Прявтось Артём Здунов. Весе пурнавозетненень пшкадемстэ, сон тешкстызе масторонь вейсэндявомань ды вийтнень ванстомань смустенть. «Раськень озксось» ундокссонзо туи кезэрень шкатнес, – мерсь сон. – Те историянтень, койтненень ды кельтненень мелень явомань кенярксчи. Минь сынек тей покш командакс, ды мон кеман, «Раськень озксонть» эряви тешкстамс седеяк келейстэ. Монень мельспаро неемс тесэ ломанть лия регионтнэстэ ды масторонь томбальде. Сюкпря весенень, кить ванстыть минек койтнень!»
