Монь сыре покштям, Поздняков Павел Архипович, – Масторлангонь I-це войнасо прянь невтиця, Георгиевской крёстонь кавалер

Тедеде топоди 110 иеть Масторлангонь I-це войнанть ушодомастонзо.

Монь сыре покштям, Поздняков Павел Архипович, – Масторлангонь I-це войнасо прянь невтиця, Георгиевской крёстонь кавалер. Эряви меремс, Георгиевской крёстось ульнесь сехте питней казнекс солдатнэнь ды унтер-офицертнэнь туртов войнань шкасто ятонть каршо тюрематнень кис.

Павел Архипович чачсь 1891-це иестэ неень шкань Кочкур буень Семилей велесэ зажиточной сокицянь-видицянь семиясо.

1914-це иестэ Паул дедань саизь фронтов. Сонзэ нуцьказо, Валерий Поздняков (монь омбо юронь од покштям) эсензэ тетянзо (Миколь дедань) валонзо коряс евтнизе тень, мезень кис Павел Архиповичнень максозель Георгиевской крёстось. Войнасо сон ледсь покш званиясо немецень кавалерист, кундызе лишмензэ, грузизе эсензэяк кавалеристэнть весе ули-паронзо марто алашанть лангс ды ветизе эсензэ частьс. Тень кис сонензэ максозельгак медалесь.

Войнасо сыре покштянень савсь улемс аволь пек кувать – ледезель кедьс. «Вишкинестэ суром те варянтень тонголия», – ледстнемстэ пейди Валера од покштям.

Семилейсэ Павел Архипович ульнесь велень советэнь васенце председателекс, колхозонь прявтокс.

Урьвакстозель кавксть: васенце козяйканть марто чачтасть колмо эйкакшт, омбоценть мартояк, Александрань, конанть ульнесь эсензэ вейке тейтерезэ, – истяжо колмо (ютксост Анна бабамдак – сехте вишкинесь).

Кулось Павел Архипович 1960-це иетнестэ.

Фотосонть: васенцесэнть – Паул дедам Вера урьванзо (удалонзо) ды Аннушка тейтерензэ (вить ёндо) марто.

Ольга Шабанова.