Мокшэрзянь театрась аноклай романтическяй премьера

Кизоть пес Мокшэрзянь национальнай театрась аноклай зрительхненди нинге кафта премьерат. Калмыцкяй режиссёрсь Борис Манджиев саранскяйнь актёрхнень мархта путсь од спектакль мокшень драматургть Валентина Ивановна Мишанинать пьесанц коряс, лемоц «Менелень нюрям» («Качели с небес»).
Тя историясь кельгомать и аерксшить, афкуксонь ёжа марямать и патриархальнай закоттнень колга, конат арсихть перафксокс павазти кить лангса.
Романтическяй историять сцена лангса путоманц лангса тяфта же работасть башкирскяй хореографсь Рамиз Мухаметшин, щапнень коряс уфимскяй художниксь Наталья Степанова, саранскяйнь сценографсь Татьяна Чувыкина. Музыкать башка тя спектакльти сёрмадозе эрзянь музыкантсь Виктор Чичайкин, конась содаф эстрадосонк Бакич Видяй псевдонимть коряс.
«Менелень нюрям» спектакльть няфтьсазь ваныхненди 16 и 17 декабрьста.
А 24 декабрьста шабатненди няфтихть «Аромат нового года» интерактивнай од представления.