Ковылкина строяйхть од куд

«Обеспечение устойчивого сокращения непригодного для проживания жилищного фонда» региональнай проектть видеса Ковылкинаса курок аделави 65 квартираса кудть строямац. Сон ащи 50 лет Октября ульцяса.
Цебярь ся, што кудть перьфса ули сембось, мезе эряви: идень кужа, спортонь дворец, соксонь база, «Парк Патриотов», школат и мзярошка лавка. Тяда башка, строявихть нинге автостоянка, спортивнай и налхксемань площадкат.
Од кудть эса 4 подъезтт , трёхкомнатнай квартирада — 15, двухкомнатнайда — 20, и однокомнатнайда — 30. Эряма васттне уштовихть башка. Квартиратне тифт тяниень пингонь планировка коряс. Кудонь строямань тефне аделамат июльти.