Минпросвещениясь ды Рособрнадзорось невтизь ЕГЭнь од расписаниянь приказонь проектэнть

«Сонзэ коряс мереви ютамс весе предметтнэнь ютксто вейкенть лия чистэ», – пачти Regnum информациянь агентствась.

Пояснительной сёрмасонть кортави: госэкзаменэнь сёрмадоманть туртов, прявт чиденть башка, кармить явозь эште чить – медьковонь 4-цесь ды 5-цесь.

Васенце чистэнть арсеви ютавтомс пересдача информатиканть, обществознаниянть, рузонь келенть, физиканть, химиянть коряс, ды теде башка омбо масторонь кельтнень коряс сёрмадомань пельксэнть. А омбо чистэнть – биологиянь, географиянь, математикань, историянь, литературань коряс ды омбо масторонь кельтнень коряс устной пельксэнть.

Истяжо проектсэ полавтозть ЕГЭнь ютавтомань шкатне. Истя, аштемковонь 4-це чистэ арсеви ютавтомс экзамен обществознаниянть ды физиканть коряс, аштемковонь 7-це ды 8-це читнестэ – информатиканть коряс ды омбо масторонь кельтнень коряс устной пельксэнть.

Аштемковонь 11-це чистэ – биологиянть, историянть коряс ды омбо масторонь кельтнень коряс сёрмадомань пельксэнть.

Тень марто вейсэ васенце ЕГЭтнень ды обязательной предметтнэнь коряс экзаменттнэнь ютавтома шкаст эзть полавтовт.

Панжиковонь 23-це чинтенть арсезть географиясь, литературась ды химиясь, панжиковонь 28-центь – рузонь келесь, панжиковонь 31-це чинтень – математикась.