АВКСЕНТИЙ ФИЛИППОВИЧ ЮРТОВОНЬ ЧАЧОМА ЧИСТЭНЗЭ 170 ИЕНЬ ТОПОДЕМАНТЕНЬ

Авксентий Филиппович Юртов чачсь 1854-це иень даволковонь 20-це чистэ Уфимской губерниянь Мензелинской уездэнь Калейкина велесэ.
1872-це иестэ, эрзятнестэ васенцекс кармась тонавтнеме Казанень «инородческой» семинариясо. Тесэ Авксентий Филиппович ютавтсь эрзянь кельс церьковань книгат, пурнась эрзянь оршамот, сёрмалесь морот, ёвкст. 1876-це иестэ сон прядызе семинариянть ды кадозель тоско тонавтыцякс. Ламо якась эрзянь велетнева, вешнесь Казанев тонавтнеме превей ды ёроков эйкакшт. Седе тов А. Юртов тусь важодеме Самарань губерниянь Сыре Бесовка велень школав. Тесэ сон тунь од ладсо ладизе тонавтома тевенть: сёрмадомадо ды цётамодо башка кармась ветямо морамонь, аволь классо ловномань урокт. Вастневсь-кортнесь эрицятнень марто, ловнось тенст книгат, сёрмалесь пельдест морот, ёвкст, ёвтамот, содамоёвкст, валмеревкст, валъёвтавкст ды раськень кель-валонь лия сюпавчи.

Авксентий Филипповичень эрямосо вешнемась алтавсь вейкентень – кандомс седе покш лезэ эсь раськентень, сонзэ ломантненень. Тень кисэ самай теизе эсензэ букварензэяк, конань эйстэ ушодовсь сёрмас эрзятнень тонавтнемась.Азбуканть мельга максозь зярыя эрзянь кавто морот: «Ракша ды соколь» ды «Васюта». Сынь ютавтозь рузонь кельс. Улить книгань вечкеме тердематкак: «Кодамо вадря кунсоломс превей ломаненть валонзо, истя вадря паро книганть валонзояк»; «Паро ломаненть вакссо свал а улят, книгась свал вакссот»; «Вадря книгасонть валтнэде медте ламбамот».

Эряви меремс, эсензэ букварденть икеле А. Ф. Юртов ламо важодсь «Образцы мордовской народной словесности. Сказки и загадки на эрзянском наречии мордовского языка с русским переводом» книганть лангсо. Сон лиссь 1883-це иестэ. Авксентий Филиппович пек мелявтсь эрзянь литературань келень орфографиянь седе паро нормань теемадо. Теде башка, просветителесь аштесь кавонзазь валтнэнь нурька черьксэнь трокс сёрмадоманть кисэ, кода ладязьгак ней эрзянь орфографиясо.