Мордовияса ётафтови «Град на Мокше» историянь фестиваль

Темникавонь аймакса 14 августста васенцеда ётафтови регионъётконь военнай историянь фестиваль. Кармай сон П. Г. Смидовичень лемса Мордовиянь заповедникть видеса. Лемтьф мероприятиясь Темникавть 485 кизонь топодеманцты и 350 кизоти ся пингста, кода мокшэрзянь масторса аделавсь крестьянскяй войнась, конань вятезе Степан Разин. Тянь колга азозе И. Д. Воронинонь лемса краень содамань республикань музеень директорть наукань тефнень коряс полафтыец Дмитрий Фролов. Фестивальти тертьфт инжихть Москуста, Нижняй Новгородста, Арзамасста и Пензаста. Нят военно-историческяй реконструкциянь клубонь няфтихть. Синь лама кизот ни покодихть «бунташнай» векть коряс.
«Град на Мокше» фестивальсь арьсеф кода «эрек историянь» ила: тяфта мярьгихть ся мепоприятиятненди, конань пингста вельмофнесазь аф аньцек тюрематнень-меснень, но и стамка ломаттнень эрь шинь эряфснонга. Сембе сафне эсь сельмососот няйсазь Темникавть историяста инь няевикс пялькснень эзда фкять, варжасазь пряснон эрь кодама мастер-класса, кулхцондыхть лекцият 17 веконь искусстватнень и ремеслатнень колга. Стане жа фестивальса кармай покодема сувениронь ярманка, кармайхть музыкантонь и лия артистонь выступленият.
Темникав аймаконь пряфтсь Сергей Кизим китькстазе, тяфтама илатне пяк эрявикст районтти, штоба тердемс тяза сядонга лама инжи и турист. Фестиавальсь срхкави ётафневомс сяда товга и нинге та сядонга келиста.

Фото объединения «Ратоборцы»