Зубу аймаконь Велезем велеса Масланцять васьфтезь ётай недляшить!
Опубликовано Вайгель - 01.03.2022
Тяда инголе минь корхтаме, што Велезем (Покровские Селищи) велеса строясть Культурань од куд. «Культура» национальнай проектть вельде сонь тиезь 9 ковста, панжезь 21 январьста. А ётай недляшить, 27 февральста, тоса ётась ни васенце оцю илась — Масланцясь. Районнай ДК-нь артисттне кеняртьфтезь велеряйхнень неделяда инголе, сяс мес 6 мартста ильхтьсазь тялоть синцень Зубуса.
Кода арьсефоль, илать ушедозь ушеса, но варма мархта ловть инкса састь мяльс поладомс ДК-ть потмоса. Залсь пяшксель: сашендсть велеряйхне, ульсть инжит шабра велетнень эздовок. Сцена лангса морасть сембонди кельговикс коллектифне: Зубу аймаконь «Поляне» ансамбльсь, Морд Полянань «Сиянь толня» фольклорнай ансамбльсь, и Заропка велень «Ляйнясь». Сембонь, кие сашендсь Масланцяв, питнефтома андозь танцти ярхцамбяльда: ушеса пидесть сиволь, а потмоса шра лангса аноклафольхть пачат-месть, самоварса пси чайня.
«Культурань тяфтама кудти аш кода ащемс тевфтома. Малацекс пингть минь ёратама ушедомс покодемать Пушкинскяй картать вельде. Кочкатама од ломатть, и терттяма артистт Саранскяйста. Тяфта же минь мяльсонк панжемс клубть видеса духовнай обитель. Катк ломаттне касыхть аф аньцек кульутрань ширде, но и духовна. Тя тевса тейнек лезды Свято-Варсонофиевскяй женскяй монастырсь», — азозе Зубу аймаконь культурань управлениянь вятись Александр Ильичёв.
Велеземонь эряйхне пяк кенярдсть Масланцяти. Тяда инголи мокшень ёмла веленять эса тяфтама илат ашесть ётафнев.
