Вечкизе эсь раськензэ

115 иеть чачома чистэнзэ топадсть Василий Коломасовнень. Кие тонавтнесь тиринь литература, парсте арсян кирдься мельсэ «Лавгинов» романонть. Сонзэ авторозо Коломасов.
Василий Максимович чачсь 1909 иень августонь 14-це чистэ Покш Березникень райононь Эрзянь Найман велесэ сокицянь-видицянь семиясо.

1933 иестэ тонавтнесь Мордовиянь совпартшколасо, мейле важодсь «Эрзянь коммуна» газетасо, «Сятко» журналсо литературной сотрудникекс. Ве шкане мик ульнесь колхозонь прявтокс, тонавтсь школасо эйкакшт. Седе тов прядызе Мордовиянь учителень институтонть.
Ушодовсь войнась ды сон саезель армияв. Тосо ульнесь связистэкс. Тюрсь ятонть каршо. 1943 иестэ стакасто ранязель ды нолдазель кудов. Казезь Трудовой Якстере Знамянь, Отечественной войнань II степенень ордентнэсэ ды медальсэ.
1956 иестэ сась эрямо Саранскоев, роботась Мордовиянь книгань издательствасо.

Литературантень совась кода прозаик ды драматург. Сонзэ сёрмадовкстнэ свал мизолкс мартольть — «Прокопыч» ёвтнемась, «Яхим Лавгинов» повестесь. «Лавгинов» романсонть невтеви эрзянь велесэ коллективизациясь. Романось совась эрзянь-мокшонь литературань сырнень фондс. 1962 иестэ «Лавгинов» романонть коряс путозель спектакля ды невтезель телевизорсо. Романось нолдазь рузонь кельсэяк.
Василий Максимович Коломасов, «Лавгинов» романдонть башка, сёрмадсь ламо ёвтнемат ды пьесат. Истя жо ульнесь ве кельстэ омбоцес паро ютавтыцякс. Коломасов вечкизе эсь тиринь келензэ ды эсь культуранзо.