«Театральная осень» фестивальсь сай Саранск ошу

8-це сентябрьста сявомок 16-це сентябрьти молемс Саранск ошсь примасы «Театральная осень» регионъётконь 5-це фестивальть. Сон ётафтови Россиянь культурань Министерствать лезксонц вельде. Фестивалень руководительть Сергей Шубть валонзон коряс, илась пуроптсыне Россиянь государственнай национальнай творческяй коллектифнень, конатне сотфт театрань марстонь судьбаса.
«Театральная осень» юбилейнай фестивальть программазоза сувайхть рузонь, мокшень, татаронь, чувашиянь, мариень кяльхнень лагса постановкат. А штоба спектаклятне шарьхкодевольхть сембонди, налхкомась мольфтеви синхроннай ётафнемань мархта.
Фестивалень сембе постановкатне няфтевихть Мокшэрзянь драмань театраса, коса тяльгихть 300 ломаньда. «Театральная осень» илати уже аноклафт билетт, тяниень пингть рамамс синь ули кода онлайн-кассаса. А од ломаттненди действондай «Пушкинскяй картась».