Сыре Шайговасо важоди «БиблиоГалактика»
Опубликовано Вайгель - 20.06.2024
Сыре Шайговань «БиблиоГалактика» ловнома кудосо валдо ды вадря.
Сонзэ прявтозо Татьяна Рассказова ёвтнизе: библиотекась панжозель 2022-це иестэ «Культура» нацпроектэнть лувсо.
Ловнома кудосонть ванстовить эрьва зяро иесэ эйкакштнэнь туртов 17 тежат книгат, конатнестэ 6 тежатнеде ламо — одт. Жанранть коряс — евкстнэнь эйстэ саезь наукань литературанть видьс.
Тесэ ули весе эйкакштнэнь шкаст ютавтоманть туртов: интернет, компьютерт, тувор лангсо налксемкат, човаронь лазнэ, презентациянь ванома тарка, чевте озамкат, ды мик беряньстэ неиця эйкакштнэнь туртов ужине.
Алкуксонь сюпавчикс библиотекасо ловови телескопось. Татьяна Рассказова ливтни сонзэ эйкакштнэнь марто ушов, косо весе мельспаросо ваныть вень менелень тештетнень лангс. Покш лездыця те тевсэнть — Шайговань школань тонавтницясь Дима Десяев.
Татьяна Ивановна мери: «Эйкакштнэде тесэ свал ламо. Сыть школадо мейле ды чинзэ перть тесэть: теске теить урокт, ярсыть, чийнить. Кизна обедтэ мейле сакшныть. Минь мартост ютавттано эрьва кодат мероприятият. Натой, а паневить (авт.: пейди авась). Сыненст вечкеви библиотекасо».
