«Шумбрат, Мордовия!»

Ожоковонь 19-це чистэ важодеманзо ушодсы «Шумбрат, Мордовия!» республикань раськень шкинемань фестивалесь-пелькстамось. Тедеде сонзэ панжсызь Покш Игнатовань ды Ичалкань буетне. Эряви тешкстамс, фестивалесь юты 28-цеде ды алтави сон Кудораськень Иентень ды Важодиця династиятнень Иентень. Кавто ковонь перть Республикань культурань кудонь сценанть лангсо эсь шкинемаст ды ёрокчист невтьсызь Саран ошонь ды республикань 22 буетне. Коень коряс, концертнэ кармить ютамо оймсема читнестэ. Чизэнзэ кавксть, 13:00 ды 15:00 чассто. Киштемань ды морамонь пелькстэнть башка, фестивалень инжетне содавтовить «Мастерство земли мордовской» декоративно- прикладной шкинемань невтематнень марто. Гала-концертэсь ютавтови ацамковонь 14-це чистэ.