Сенемасу тердян инжихть: И.М.Девинонь 100 кизонь топодеманцты

Ётась 24 кизот кода ётксонк аш Мордовиянь народнай поэтсь, Великай Отечественнай войнань участниксь, «Нардише» романть сёрмадыец Илья Максимович Девин. Но мялямсь колганза эряй. Июльть 20-це шистонза поэтти топодель 100 кизот. Тянкса сонь шачема-касома уженясонза Старошайговскяй райононь Сире Теризморга велеса ётафтсть «Сенемасу тердян инжихть» лем ала ила-пуромкс.
Церькавть и культурань центрать инголе ладяфоль И.М.Девинонь фотографиянц и стихстонза строчка мархта сенем менель тюсса баннер, тифоль фотографиянди васта. Национальнай культурань центрань хорсь васьфтезень инжихнень «Панжи, панжи лайме порась» мороса, валхнень конанди сёрмадозень И.Девин, а музыкать Н.Кошелевась. Сяда тов сембе марса путсть панчфт Народнай поэтть памятниконц лангс, лямбе валса лятфтазь мокшень содаф ломанть.

Илань панжемань вал максфоль Старошайговскяй райононь оцюнять заместителенцты Наталья Александровна Жевлаковати: «Илья Максимович Девин тага кочкамазь марса, ялга ёткса Сире Теризморга велеса. Мзярс минь эрятама, минь лятфтасаськ земляконьконь и ёратама максомс тя мялямть поколенияста поколенияс. Тяда инголе минь ётафнеме лятфнемань пуромкс И.М.Девинонь кулома шиста. Тя кизоня ётафтоськ шачема шистонза. Карматама тя койть кирдема сяда товга. Седи ваксста сюконян Сире Теризморгань Национальнай культурань центрати тевснон инкса».

Илась ётась лятфнемань-концертонь лаца. Ушетксста Национальнай культурань центрась няфтсь кунардонь пингонь рьвянянь ладямань кой. Сяльде сембе инжихнень лемс морась «Мокшаваня» Сире Теризморгань ансамбльсь. Мокшень, эрзянь, рузонь морот казсть Артём Мамаев и Сергей Фудин. И.М.Девинонь стихотворениянзон лувозь велень школань тонафнихне, а стане жа «Современник» Саранскяйнь поэзиянь клубонь участникне. Лямбе валхт поэтть-землякснон колга азсть Мордовиянь заслуженнай поэтсь Рая Орлова, А.С.Пушкинонь лемса библиотекань сотрудниксь В.И.Пронина и лиятне.