Саранскяйса ётай од ломанень театральнай фестиваль

21-25 сентябрьста Мордовияса васенцеда ётай // ХУДСОВЕТ // од ломанень межрегиональнай фестивальсь. Тя проектсь получась лезкс Культурнай инициативань Президетскяй фондть ширде. Аноклаец и ётафтыец — Мордовия Республикань Театральнай деятельхнень союзсна. Организаторхне ёрайхть кочкамс Саранскяйса од ломанень инь цебярь театратнень и спектаклятнень марнек Россияста. Фестивальти тердевихть авторитетнай экспертт и эсь тевонь содай наставникт, конат ётафтыхть форумонь участникненди и театральнай направлениянь студентненди мастер-класст.
«Минь кунара ульсь мяленьке ётафтомс од ломанень фестиваль. Мордовияса 15 кизода лама моли «Соотечественники» международнай фестивальсь, коза сашендыхть маластонь и ичкоздень зарубежьянь коллектифне, ётафневихть национальнай театрань межрегиональнай фестивальхть. Мордовиянь эряйхненнди мялезост, залхне най пяшксет. Но ня фестивальхнень эса шуроста васьфтят сянь, мезсь салалезень мяльснон од ломаттнень. Сянкса и шачсь «Худсовет» проектсь», — мярьгсь Театральнай деятельхнень союзснон председателец Андрей Анисимов.