Саранскойсэ ютасть кортамот СВО-со прянь невтицятнень лемс кеврунгонь путомадо

Проектэнть ланга кортамотне ютасть И. Д. Воронин лемсэ краеведениянь музейсэ, Архитектурань советэнь промкссонть. Эйсэнзэ невтизе прянзо Мордовиянь Прявтось Артём Здунов.

Кеврунгонь коряс эскизэнзэ невтинзе Россиянь художниктнень вейсэндявксонтень совицясь, скульпторось Андрей Филатов. Васенцесэнть ашти бронзань ушман. Удалонзо – гранитэнь стела, конась яжавсь пулятнень эйстэ. Верьга ливтить колмо каргот, конат невтить кулозь ушмантнэнь оймест. Проектэнть коряс, целанек кеврунгонть сэрезэ 4 метрат, солдатонть – 2,4 метрат. Ули эште вейке эскиз. Эйсэнзэ, ушмандонть башка ашти вишка тейтерне, конанать вансты солдатось.

Архитектурань советэнь пря невтицятненень вечкевсь омбоце вариантось.

Арсематнень коряс, кеврунгось карми аштеме Изнямонь площадьсэ, Амадиця толонть ды Мордовиясо чачозь ушмантнэнень, конат кулось Ине войнасо, мемориалонть вакссо.

Мордовия Республикасо СВОнь ветерантнэнь вейсэндявксонь прявтось Александр Беляйкин ды лия ветерантнэ явсть мель аламодо полавтомс кеврунгонть ды путомс эзэнзэ стеллат кулозьтнень лемест марто.

Мордовиянь Прявтонть Артём Здуновонь валонзо коряс, СВО-нь откерьтнень лемс кеврунгодонть башка, Саранскойсэ арсеви путомс кавто лия кеврунгот: Чернобыльсэ АЭСэнть ликвидатортнэнь лемс ды Сурской рубежень теицятнень лемс.

Промкссонть истяжо невтезельть Саранскойга туристэнь од маршрутось, «Галерея в моем городе» фотовыставкань проектэсь ды Изнямонь чинь мазылгавтомань концепциясь.

Фотографиясь: «Известия Мордовии»