Саранскойсэ таго юты «Иненармунь» пелькстамось
Опубликовано Вайгель - 02.12.2024
Эряви меремс, тедеде эрзянь ды мокшонь мазыйкатнень ютксо пелькстамось юты омбоцеде. Мелят эйсэнзэ онкстызь виест Мордовиясто, Пензасто, Москвосто ды Москов ёнкссто 13 эрзяват ды мокшават. Изницякс лиссь Мария Шумкина Московсто. Гран-принть саизе Кристина Масенина Рузаевкань буестэ.
Тедедеяк «Иненармунь» лементь кис кармить бороцямо 18-35 иесэ од тейтерть, конат парсте содасызь ды кортыть тиринь кельтнесэ, ды зярдояк икеле эзть пелькста мазычинь профессиональной пельктамосо.
Те шкантень ютасть кочкамонь эскелькстнэ. Ней тейтертне невтить эсь ёрокчист лембе оршамонь кодамосо ды стамосо. Сыненст эряви эсь кедьсэ теемс варьгат, пряс путомкат, кирьгань тапарямот ды сёрмадомс лембе вал марто сёрмат минек ушмантнэнь туртов, конат ванстыть минек масторонть СВО-со.
Мейле мазыйкатне кармить ютамо эрьва-кодат мастер-класст.
Изницянть кочкасызь Мордовиянь национальной театрасо ацамковонь 8-це чистэ. Ушодксось 17 чассто. Тейтертненень карми эрявомо ёвтнемс эсь ланга эрзянь эли мокшонь кельсэ, ютамс дефиле, невтемс шкинемань номер. Теде башка, тедеде кармить онкстамо тейтертнень содамочист национальной культуранть лы тиринь Мордовиянть кувалма.
Пелькстамонть ютавты «Юрхтава» мокшонь авань вейсэндявксось Культурань, национальной политикань ды архивень тевтнень коряс министертсванть лезксэнзэ вельде.
