Саранскойсэ панжовсь «Валентин Попков. Долгий свет души» невтемась

Сон алтазь РСФСР-нь заслуженной художникенть, МАССР-нь раськень художникенть Валентин Попковонь чачома чистэнзэ 80 иетненень. Экспозициянтень совасть С. Эрьзянь лемсэ изобразительной искусствань музеень архивтнестэ, художникенть мастерскойстэ малав 100 роботат — пейзажт, натюрмортт, портретт ды лият. Домкасто невтемадонть ёвтнесь Елена Голышенкова искусствоведэсь, музейсэ наукань-исследованиянь отделэнь ветицясь, невтемань кураторось.

Валентин Попков чачсь 1941 и. сундерьковонь 18-це чистэ Краснослободской буень Од Карьга велесэ. Сон прядызе Казанень художествань училищанть. Ламоксть невтсь пря раськеютонь, регионъютконь, региононь, ошонь невтематнесэ.
Валентин Алексеевич — неень шкань отечественной искусствань содавикс художник. Сонзэ роботанзо ванствоить аволь ансяк Мордовиянь музейтнесэ. Улить, саемга, Третьяковской галереясо ды Неень шкань искусствань музейсэ Москов ошсо.

Невтемась роботы С. Эрьзянь лемсэ изобразительной искусствань музеень невтемань нупальсэ.