Саранскойсэ кочкизь сехте мазый ды шкинемань мокшаватнень ды эрзяватнень
Опубликовано Вайгель - 11.12.2023
«Иненармунь» Регионъютконь I-це пелькстамонтень анокстамось ды сонзэ гала-концертэсь ютасть Мокшэрзянь драмань театрасо.
Финалс понгсть 18 иесть саезь 35 иес 13 тейтерть Мордовиясто, Пензасто, Москвосто ды Москов енкссто. Сыненст эрявсь евтнемс тиринь кельсэ эсест ланга, невтемс эсь шкинемаст ды ютамс раськень оршамосо сцена ланга. Ваныцятненень, конатнеде ульнесь пешксе нупаль, пек вечкевсь концертэсь.
Цётамотнень коряс пелькстамосо 1-це тарканть саизе Москов ошонь «Эряма» ансамблянь солисткась Мария Шумкина, 2-центь – М. Е. Евсевьев лемсэ университетэнь студенткась Алена Маскаева, 3-центь – «Тяштеня» Эйкакшонь эстетикань трямонь куронь педагогось Светлана Навратова.
Гран-прись сатотсь Национальной театрань артисткантень Кристина Масенинанень.
«Мон пек талнынь, апак вано тиринь сценанть лангс, косо ютась пелькстамось. Самай те чистэнть, кавто иеде седе икеле, ютась монь дебютом театрасо», – мерсь мазыйкась.
Эряви меремс, аволь ансяк изницятненень максозельть питней казнеть. Весе тейтертненень явшесть футболкат, кескавт, лембе вельтямот, цецят. Прявт казнекс весень туртов кармась «Рав – ояксчинь лей», кона юты мельга молиця иестэ аштемковсто, этноэкспедицияв ардомась. Теде мерсь Мордовия Республикасо Культурань, национальной политикань ды архивень тевтень коряс министерствань прявтось Светлана Баулина.
«Иненармунь» пелькстамонть ютавтызь «Юрхтава» мокшонь авань вейсэндявксось, Национальной драмань театрась Минкультнацонь лезксэнзэ вельде.
