Саранскойсэ цётызь «Экология — дело каждого» Раськеютконь 4-це премиянть

Саранскойсэ казизь «Экология — дело каждого» Раськеютконь премиянь казнень саицянть Софья Лапшинань.

Тейтерькась тонавтни Саранскоень 1-це школасо. Пелькстамосонть невти пря аволь васенцеде. Мелят сон кармась изницякс региононть пельде «Ванстодо пертьпельксэнть сыця шканть туртов» артовксонть кис.

Тедеде Софья кармась изницякс «»Экотуризм» номинациясо «Экотур по Роза Хутор» видеонть кис. Шнамонь коневонть ды казнетнень тейтерькантень максынзе Нижегородской енкссонть ды Мордовия Республикасо Росприроднадзоронь регионъютконь Управлениянь прявтонть полавтыцянзо тевтнень топавтыцясь Александр Кармайкин. А вана сехте прявт казненть Софья получизе кизэнть ушодкссо, зярдо ардтнесь Анапав, «Жемчужина России» шумбрачинь витемань эйкакшонь лагерев.

Теде башка, те чистэнть Александр Кармайкин макссь сюконмонь валт ды цецянь пусмот республикань СМИтненень Мордовиянь пертьпельксэнть ванстоманзо кувалма парсте сермадозь ды невтезь материалттнэнь кис.

Эряви меремс, неень шкасто ушодовсь «Экология дело каждого» 5-це премиянтень важодемань саемась. Яволявкстнэнь мереви кучомс 2025-це иень чадыковонь 1-це чинть самс. Изницятнень учить питней казнеть, конатнень ютксо смартфонтт, планшетт, иневедь чиресэ оймсемась. Истяжо сыненст максовить баллт школатнень прядомадо мейле Россиянь 100 вузтнэс коневонь максомсто. Неть вузтнэнь ютксо — Н. П. Огарев лемсэ университетэськак.

Седе домкасто — пелькстамонь теицянть сайтсэ.