С. Д. Эрьзянь лемсэ музеесь содавтсамизь од фотографтнэнь марто

Ютазь сёксенть Мордовиясо ушодовсь «Молодые ­– Молодым» арт-проектэсь, конась панжсь ваныцятнень туртов ламо од лемть артыцятнень ды живописецтнэнь ютксо.

Ней музеев сыцятне несызь од фотографонь 80 ламо роботаст. Кода мерсь проектэнь ветицясь Елизавета Курышева, невтемасо невтсызь пряст 18 и. саезь 35 иес 16 авторт. Ютксост эрзянь сёрмадыцясь, «Сятко» журналонь отделэнь редакторось Алина Подгорнова. Сонзэ валонзо коряс, фотографиянть пачк евтави се, мезесь а евтави валсо.

Истяжо ваныцятне несызь сокссо ардомань коряс спортонь мастерэнть Трофимова Александра, С. Д. Эрьзянь лемсэ музеень важодицянть Танасейчук Романонь, художествань школань тонавтыцянть Ангелина Асманкинань ды  лиянь роботаст.

Невтемась панжови чадыковонь 6-це чистэ 17:00 ч.

Фотось Алина Подгорновань