РЕСПУБЛИКАНЬ ПРЯВТОСЬ ЁВТАСЬ ПОЗДОРОВТ АВАТНЕНЕНЬ.

Эйзюрковонь 4-це чистэ Оперань ды балетэнь театрасо ютавтовсь кенярксчинь промкс, конась алтазель Тейтерь-авань раськеютконь чинтень. Пурнавозетненень пшкадсь Мордовиянь Прявтось Артём Здунов. Сюкпрянь башка валт республикань руководителесь ёвтась специальной военной операциянь участниктнень аватненень, нитненень, тейтертненень ды сазортнэнень — весенень, кить учить фронтсто цёратнень ды ванстыть эсь геройтнеде ледстнематнень. «Сюкпрянь валт тыненк весе минек обществанть пельде», — мерсь региононь руководителесь.

Лембе поздоровт ёвтасть аватненень-ветерантнэнень, Сурань оборонань рубежень строицятненень. «Те минек ледстнематне, те ине тев! Седейшкава арсян тенк шумбрачи ды кувака эрямо!» — мерсь Мордовиянь Прявтось.

Россиянь Федерациянь Президентэнть Владимир Путинэнь ушодксонзо коряс мелят нолдазь тевс «Семья» национальной од проектэсь, конась аравтозь авакс улемань ды эйкакшпорань ванстомантень. Аванть прявт тевезэ — каземс эрямо, теемс эсь путовкс демографиянь тевентень. «Аванть решениявтомо тесэ кодаяк а лиси. Секскак, вечкевикс цёрат, те чистэнть пшкадян тенк: яводо мель эсенк вечкевикстнэнень, бажадо теемс весементь, мезе сыненст эряви», — мерсь Мордовиянь Прявтось.

Ававтомо важодемскак стака. Паряк, малав арасть истят профессият, косо авольть уле пародояк паро ават. «Тынь — минек вечкевикс ялгат, боевой оят, минек кемевикс лавтов», — тешкстызе Артём Здунов.

Республикань руководителесь явшесь покш казнеть. Истя, РФ-нь Президентэнть указонзо коряс «За заслуги перед Отечеством» орденэнь II степенень медальсэ казезь «Биохимик» АО-нь участкань прявтось Любовь Артюшина. Истямо жо казне максозь «Саранский механический завод» ФГУП-нь штамповочной цехень кшнинь ванськавтыцянтень Татьяна Родинанень.

Казезтнень ютксо — эрьва кодамо профессиянь представительтне: «Биохимик» лабораториянь старшей контрольной мастерэсь Ольга Ушенина, Зубова-Полянань педагогической колледжень тонавтыцясь Нина Баранова, Мордовия Республикань краеведениянь музеень старшей научной сотрудникесь Лидия Полянская, сыре ломантнень ды инвалидтнэнь туртов Ицялонь кудонь-интернатонь старшей медицинской сестрась Татьяна Шматова, Атемаронь нармунень фабрикань нармунтнень мельга ваныцясь Ирина Киселева, Саранскоень механической заводонь сборкань участкань малярось Мария Мартынова, РФ-нь Президентэнть юрсо Мордовия Республикань Свалшкань представительствань раськень культурань кевкстематнень коряс советникесь Лидия Круглова ды ламот лият.

Виев цяпамосо залось вастызе Тамара Полякинань — Покш Игнатбуень Ташто Кшуманця велень эрицянть. 2026 иень даволковонь 17-це чинь вестэнть кирвазсь кудось, косо ульнесь Тамара Николаевна вете нуцьканзо марто. Авась шкастонзо редизе кирвазема тарканть, стявтынзе эйкакштнень ды ливтинзе ушов, вишка эйкакшонть жо ливтизе кедьсэнзэ. Мордовия Республикань Прявтонть указонзо коряс сеть тевдеематнень кисэ, конат невтезь толстонть эйкакштнень идемстэ, авась казезь «За смелость и отвагу» отличиянь тешкссэ.

Аватненень паро казнекс кармась кенярксчинь концертэсь, конань анокстызь республикань шкинемань коллективтне.