Покш Игнатовань буесэ прядовсь музеень витнемась

Историянь-краеведениянь музеенть паролгавтомазо мольсь «Культура» нацпроектэнть лувсо. Одкстомтозь учреждениясь панжинзе кенкшензэ ютазь иенть песэ.

Витнемань тевтнень лувсо мазылгавтозель музеенть лангозо, теезель латось, полавтозель совамо таркась, одкстомтозельть инженерэнь-техникань коммуникациятне, ютавтозельть мазылгавтомань тевть.

Музеесь пурназель-теезель 2023-це иестэ. Сон ашти 1975-це иестэ кирпицьстэ теезь вейкеэтажонь зданиясо. Ламо экспонаттнэнь, конатнень ютксо кезэрень шкань кедьёнкст, фотографият, документат, сёрмат, кандызь буень эрицятне.

Башка каштанчикс ловови 1903-це иень фотографиясь, конасонть снимазть Кексгольмской полконь Лейб-гвардиянь солдат ды офицерт. Метра келес ды пель метра сэрьс покшолмань фотосонть неяви эрьванть 1250 ломаньтнестэ чамазо.

Неень шкасто музеень инжетненень мереви теевемс содавиксэкс свалшкань экспозициянть марто, кона алтазь буень историянтень, койтненень. Ули невтема, алтазь Покш Игнатовань буесэ чачозь СВО-со прянь невтицятненень.

Музеенть одкстомтомазо поладови. Тедеде тов арсеви рамамс невтемань ды экспонатонь ванстомань од оборудования. Важодемась карми молеме «Семья» од нацпроектэнь лувсо.