Мордовиясо нолдыть демографиянь коряс варчамонь проект

Площадкакс, косо карми топавтовомо тевесь, кочказель Отяж буесь. Проектэнть коряс кевкстематне кортазельть аштемковонь 25-це чистэ республикань Правительствасо, косо ульнесь репродуктивной шумбрачинть коряс Россиянь Минздравонь аволь штатной прявт специалистэсь, Российской Федерациянь Общественной палатантень совицясь Олег Аполихин.

Ледстясынек, масторонь Президентэсь Владимир Путин Федеральной Собраниянтень пшкадемасо макссь кармавтома малавгалиця 6 иетнестэ кепетемс чачомань тешксэнть. Тень туртов кармить совавтовомо тевс од арсемат трямонь ды образованиянь системантень, региононь ды экономикань кастомантень-кепетемантень. Чачоманть кепетеманзо ды ламо эйкакшт триця кудораськетнень ламолгавтомаст туртов 2025-це иестэ саезь минек масторсо ушодови «Семья» национальной од проектэсь.

Республикань Прявтось макссь кармавтома анокстамс мероприятиянь планонть, конась карми алтазь репродуктивной шумбрачинть ванстомантень, од ломантнень шумбрачисэст колавоматнень муемантень, кудораськень питнейчитненень ды шумбрасто эрямонть ветямонтень.