Мордовиясо киберспортсо чемпионокс таго кармась Артур Стеняев

Компьютерэнь спортонть коряс пелькстамотне «FIFA24» дисциплинасо ютасть Саранскойсэ медьковонть песэ. Сехте виев спортсмен лементь кис виест онкстасть 14 ломанть.

Цётамосо, изнямонть саизе республикань колмоксть,  а ней – нилексть, чемпионось Артур Стеняев.

Кода мерсть Россиясо Компьютерэнь спортонь федерациянь республикань отделениясо, Артур – регионсо сехте виев спортсментнэнь ютксто вейкесь, сон – ськамонзо, кинь ули интерактивной футболонь коряс 3-це разряд.

Артур Стеняев карми онкстамо виензэ Мордовиянть пельде Россиянь футболонь вейсэндявксонь Кубкасонть, конась юты сёксня.

Омбоце тарканть чемпионатсонть саизе Александр Терёшкин, колмоценть – Максим Пугачёв.

Фотось: Мордовия Республикасо Компьютерэнь спортонь федерациянь