Мордовияса ëтась «Лучшая книга года» III-це пялькстомась

Кафта кизоти весть Мордовияса ëтафневи «Лучшая книга года» пялькстомась. Тядде эсонза няфтьфоль 150 книга, конатнень эзда кочкафтольхть инь цебярьхне.

«2022/2023 кизонь инь цебярь книгась» III-це Республиканскяй пялькстомаса сяськихнень лемсна азфтольхть А. С. Пушкинонь лемса Национальнай библиотекаса. Библиотекань залу пуромкшнесть авторхне, редакторхне, издательхне, экспертнай совету сувсихне.

Мокшень кяльса инь цебярь книгакс «Проза и драматургия» номинацияса лемтьфоль Валентина Мишанинать «Кяпеменельге» книгац, эрзянь кяльса тя номинацияса лиссь сяськикс Василий Сергеевич Брыжинскяень книгац «Люди журавлиной дороги» («Каргонь кинь ломань»).

«Поэзия» номинацияса мокшень кяльса сяськсь «Шачема масторть араласаськ» Николай Циликинонь книгац, эрзянь кяльса — Татьяна Мокшановань «Кудов ки» («Дорога домой») книгац.

«Идень инь цебярь книгась» номинацияса мокшень кяльса арась сяськикс Рая Орловать «Азбукась стихса» книгац, эрзянь кяльса — Геннадий Гребенцовонь «Азбукась стихсе» книгац.