Мордовияса апрельста арьсеви панжемс памятник Михаил Девятаевти

2-це мартста Мордовиянь оцюнять тевонзон тииец Артём Здунов васетькшнесь Гуманитарнай наукань Научно-исследовательскяй институтть вятиенц Галина Куршевать мархта. Вановсь, кода патриотическяй проекттнень коряс фкя-фкянь мархта покодихть республикась и военно-патриотическяй обществась.
Башка мяль шарфтовсь Торбееваса Советскяй Союзонь Геройти Михаил Девятаевти памятникть панжеманцты. Састь мяльс панжемс сяка пингть, мзярда прокатс лиси Тимур Бекмамбетовть фильмац, конань тяфта и лемоц «Девятаев». Кинось лиси апрельста.
Тяфта же корхтамась мольфтевсь «Сурский рубеж» мемориалть тиеманц колга, и Фёдор Ушаковть усадьбанц петеманц колга. Артём Алексеевич мярьгсь, што тисы сембонь ня проекттнень эряфс нолдамаснонды.