Мордовиянь вирень ванстыцятнень автопарконтень састь од машинат

Мордовиянь вирень ванстыцятнень автопаркось пештявсь 9 машинасо.  Советской площадьсэ ключтнень «Нива-Легенда» ды «Нива-Тревал» од машинатнень эйстэ максынзе Мордовиянь Прявтось Артём Здунов.

«Течи минь, коенть коряс, пуроминек тесэ ды макстано машинат вирень ванстыцятненень. Арсян, техникась пек лезэв вирень хозяйстванть одкстомтоманзо ды кирдеманзо туртов. Сон лезды пирямс вирень законодательствасо коламотнень, шкасто муемс вирьсэ кирвазема таркатнень.   Мелят те роботась, ды толонь муемась ульнесь сэрей таркасо», – тешкстызе региононь ветицясь.

Машинатнень эйстэ ключт макссть Березникень, Виндреень, Зубовань,  Краснослободскоень, Ковылкинань ды Темниковань лесничестватнень важодицятненень. Сынь ёвтасть сюконямонь валт Мордовиянь прявтонтень од техникань рамамонть кис.

Ключтнень максомадо мейле Артём Здунов ваннынзе машинатнень. Эрьвасонть ули весемесь эрявиксэсь – электропилат, койметь, вирень толоньмацтемат, ведень кирдемкат.