Мордовиянь спортсменэсь сайсь Весероссиянь турнирэнь сырне
Опубликовано Вайгель - 16.09.2024
Жамболат Локьяев кармась Олимпийской налксематнень чемпиононть Алексей Шумаковонь казнензэ лангс грекень-римень тюреманть коряс Весероссиянь 41-це пелькстамотнесэ изницякс.
Цёратнень ютксо турнирэсь ютась Красноярск ошсо. Эйсэнзэ невтизь пряст Россиянь 16 регионсто 100 спортсмендэ ламо.
Мордовия Республикань Спортонь тюремань ды дзюдонь олимпийской резервень школанть пельде тосо пелькстасть кавто спортсмент. Кавонест сайсть вадря таркат: Жамболат Локьяев — сырне 63 кг сталмонь категориясо, Алексей Киянкин – сия 72 кг сталмосонть.
Фотографиясь: Академия борьбы им. Д. Г. Миндиашвили
