Мордовиянь шатерось яволявтозель невтемань сехте вадря пространствакс «Метеор» форумсо

Равчирень федеральной ёнксонь од ломанень меропритиясь ютась Нижний Новгород ёнксонь Сосновской буесэ медьковонь 4-це чистэнть саезь 9-це чинть самс. Тедеде «Метеорось» совась Росмолодёжонь форумтнень юткс. Мордовиянь пельде тов ардтнесть 65 од ломанть, конатнестэ 12-не «Движение Первых» вейсэндявксонь региононь отделениятень совицят.

Форумсо кортамось мольсь роботыця од ломантнень туртов ПФО-нь общественной од проектэнь теемадо. Тешкстазельть стакачитне, конатнень марто савкшнови вастовомс роботыцятненень ды роботань максыцятненень, кортазельть предприятиятнень роботниктнень сеть категориятне, конатнень эряви совавтомс проектэнтень.

Форумсо важодсь стендэнь программа, косо ПФО-нь весе регионтнэ невтизь эсь делегациятнень шатёрост. Мордовиянь кужось лемдязель «Тиринь масторокс». Сон явозель колмо пельксэс, конат невтсть колмо шкат – икелень, течинь ды вандынь. Эйсэст невтезельть эрзятнень ды мокшонтнень оршамопелест, литературась, газетатне, фотографиянь невтемат, оймсемань тарка, грантонь сермадомань зона ды лият.

Цётамосо, Мордовиясь кармась изницякс региононь шатёртнэнь ютксо пелькстамосо «Лучшее выставочное пространство» номинациясо. Теде башка, казнень саемань ды изнямонь таркат сайсть Мордовиянь башка од ломанть. Ютксост Анастасия Коченова, Анастасия Макушкина, Елизавета Прохорова, Ярослав Рузанов, «Варма» этно-арт-театрась.

Целанек, Мордовиянь командась сайсь 2-це тарка «Зарница 2.0» войнань-патриотонь налксемасо.