Лямбирень Коммунарсо панжовсь «Книжный сад» неень шкань модельной библиотека

Саловской велень ловнома кудось теезель одс «Культура» нацпроектэнть коряс. Тень туртов явозель 8 млн. целковойде ламо ярмакт региононь ды федерациянь бюджетнестэ. Лямбирь буень прявтонть лезксэнзэ вельде муниципальной бюджетстэ явозель ярмак интернетэнть ветямонзо ды газетань сёрмадстомаст туртов.

Ловномань од кудось явозь зяро-бути пельксэс. Совамсто понгат «Садовый навигатор» зонантень. Тосо путозь ловнома кудонь важодицянть туртов таркась,  интерактивной тувор, од ломантнень туртов литература.

Эште вейкесь – «Почитай-ка!» эйкакштнень туртов таркась. Тесэ ули весемесь шкинеманть туртов: тувор лангонь эрьва кодат налксемкат, налкшкеть, мольберт. Рамазть од книгат, конатнень ютксо неень шкань изданиятне, теезь 3D ды 4D форматсо.

«Тропинка к успеху» ламофункциянь зонасо ули весемесь беряньстэ неиця ломантнень туртов. Тесэ жо ашти аэрохоккей, ноутбук марто стольть, проектор марто экран, виртуальной невтемань ваноманть туртов VR-сельмукшт. Тесэ жо пурназь «Земля в цвету» книгань невтемась, алтазь «Коммунар» плодсовхозонь историянтень. Теке нупальсэнть – книгань прявт фондось. Проектэнть коряс сон одкстомтозель 4 тежадо ламо книгас. Сынст рамамост туртов явозель 2 млн. целковойде ламо ярмак.

Истяжо тосо ули «Тенистая беседка» пелькс, косо мереви аштемс, ловномс вечкевикс книгат ды ванномс журналт.