«Кода эри эрзянь морось» кинофильмась кармась изницякс раськеютконь фестивальсэ
Опубликовано Вайгель - 29.10.2021
«Туйвеж» финнэнь-угрань раськетнень неень шкань кинонь ды фотоискусствань пелькстамонь программасо онкстасть виест 190 роботат, конатне кучозельть Россиянь 25 регионтнестэ ды 4 омбо масторсто.
Кода мерсть фествиалень теицятне, тедеде сон юты 7-цеде. «Туйвеж» валось коми кельстэ рузонь кельс ютавтови кода «Перекрёсток», эли кода «киуло» эрзякс. Фествиалесь алтазь финнэнь-угрань раськетнень ютксо сюлмавоматнень кепетемантень. Сон вейсэнди неень шкань визуальной искусствань эрьва кодат изобразительной жанрат ды малавикс культуратнень.
Документальной нурька фильматнень ютксо покш питне, васенце тарканть, тедеде жюрись максызе «Кода эри эрзянь морось» фильмантень, конанть арсизь-теизь Йовлань Олонь лемсэ «TOORAMA» фольклоронь ансамблясь. Сценариясь – Александр Учеваткинэнь.
Сонсь кинось снимазь Отяж буень Сабанцелесэ. Сюжетсэнть молить эрзянь кельсэ кортамот раськень моронть эрявиксчинзэ ланга. Эряви тешктамс, кинонть перть, весе кортамотнень марто молить рузонь кельсэ субтитрат.
Весемеде башка, «TOORAMA» коллетивень прянь невтицясь Андрей Кузнецов, кона тейсь музыкань клип «Шеньжа» моронтень, тешкстазель «За лучшую режиссуру» дипломсо.
