Ицял буесэ топавтовить федеральной программатне

Ицял буень Ицял велесэ «Комплексное развитие сельских территорий» программанть коряс паролгавтови ознома кудонть вакссо эрькесь. Весемезэ сонзэ перька тарканть мазылгавтоманзо лангс явозель 2,5 млн. цел. ламо. Тосо малав путозь ломантнень туртов якамо таркась. Теде башка путыть эземть, нурямот, фотозона, озавтыть кальть, мазый куракшт, путыть клумбат.
2020-це иестэ теке программанть коряс тосо теезель эйкакштнень туртов площадкась, 2022-це иестэ витнезель Ине войнасо ушмантнэнень путозь кеврунгось.

Кемлясо эрямонть туртов а маштовиця кудотнесэ эриця ломантненень тейсть кавтоквартирань кудо. Те шкантень кудось малав анок миемантень, ды курок сонзэ эйстэ ключтне кармить максозь азортнэнень. Буень прявтонть Валентина Дмитриевань валонзо коряс, тедеде Ицял енкссо весемезэ арсезь рамамс 21 квартира те программанть коряс.

Истяжо те шкане тосо моли сыре ломантнень туртов интернат-кудонть теемазо, кона карми кельгстеме 150 ломанть.