Эрзятне тешкстызь тиринь келень кенярксонть

А. С. Пушкинэнь лемсэ национальной ловнома кудосо ютась покш кеняркс — Эрзянь келень чись, кона эрьва иестэнть тешкстави чадыковонь 16-це чистэ — чистэ, зярдо чачсь А. П. Рябов лингвистэсь. Библиотекасо пуромкшнось Мордовиянь эрьва ёндо эрзянь раськесь. Кенярксонть потсо ёвтазельть ламо лембе валт, гайгсть тиринь кельсэ гайтев морот, казезельть шнамонь конёвт ды книгат. Тенде башка, кортасть стакачитнень лангаяк.

Мероприятиянть ютавтызе Эрзянь раськень коень-кирдань, келенть ванстомань ды кастомань-кепетемань фондось.