Эрзятне ды мокшотне сёрмадсть диктант

А. С. Пушкинэнь лемсэ национальной ловнома кудосо ютась «Диктант на мокшанском и эрзянском языках» образованиянь Весероссиянь акциясь. Сонзэ сёрмадомо сакшность Мордовиянь писательть ды поэтт, национальной журналистт, эрзянь ды мокшонь келень тонавтыцят ды весе, кинь ульнесь мелезэ.
Диктантонь текстэсь саезель Мордовия республикань заслуженной писателенть Никул Эркаень «Алёшка» произведениястонть. Сонзэ ловнызе Светлана Пивкина — филологиянь наукань кандидатось, «Известия Мордовии» Автономной учреждениянь «Вайгель» радиопрограммань прявтось, «Гильдия межэтнической журналистики» Мордовия республикасо Региононь отделениянь журналистэнь Регионъютконь вейсэндявксонь прявтось.
Мокшонь кельс текстэнть ютавтызе Пётр Левчаев, Мордовия республикань заслуженной писателесь. Ловнызе — «Мокшень правда» газетань политикань отделэнь прявт корреспондентэсь, Россиянь писательтнень вейсэндявксонтень совицясь, поэтэсь, публицистэсь, Мордовия республикань Прявтонь ды Мордовия республикань Государствань премиятнень лауреатось Владимир Нестеров.

А. С. Пушкинэнь лемсэ национальной ловнома кудодонть башка, Саранскоень эрицятне сёрмадсть диктант Н. П. Огарёвонь лемсэ Мордовиянь государствань университетсэ ды М. Е. Евсевьевень лемсэ педагогикань университетсэ. Истяжо акциясь ютась Мордовиянь весе буетнесэ.
Тедеде, эряви меремс, диктантонть сёрмадсть аволь ансяк Мордовиясо. Эсь виест эрзянь ды мокшонь кельтнень содамост коряс онкстызь Россиянь ламо регионтнесэ, косо эрить эрзят ды мокшот: Башкортостансо, Чувашиясо, Татарстансо, Московсо ды Московонь ёнкссо, Санкт-Петербургсо, Нижегородской, Пензань, Ульяновскоень, Самарань ёнкстнесэ, Тольяттисэ. Тенде башка, — Эстониясо ды Казахстансэ.

Диктантось алтазь тиринь кельтнесэ грамотань кепетемантень. Сонзэ теицянзо: Финнэнь-угрань раськетнень Равчирень кужось Мордовия республикань Культурань, национальной политикань ды архивень тевень министерстванть лезксэнзэ вельде.

Эрьвась, кие сёрмадсь диктант, получи сертификат.