Ельниковань аймакса одкстоптовихть школатне

«Образование» национальнай проектть эряфс ётафнемань рамкасонза шумордавсь Стародевиченскяй средняй общеобразовательнай школать петемац.

Учрежденияса тифоль помещениять потмонь отделкац, одкстоптофтольхть кенкшне, тифоль отоплениянь, веденьмаксомань, канализациянь и электричествань од сеттне. Стане жа школаса покоди «Точка роста» цифровой и гуманитарнай профильхнень коряс образованиянь Центрась.

Лятфтасаськ, што Россияса ётафтовихть эрявс 13 национальнай проектта. Ёткссост и «Образование» проектсь.